سلمان خان کی صحت سے متعلق حیران کن انکشافات

 دی گریٹ انڈین کپل شو (سیزن 3) کی تازہ قسط میں بالی ووڈ کے سپر اسٹار سلمان خان نے پہلی بار اپنی صحت سے متعلق سنگین مسائل کا انکشاف کیا ہے، جن میں دماغی اینیورزم، اے وی مالفارمیشن اور ٹرائی جیمینل نیورالجیا جیسی پیچیدہ بیماریاں شامل ہیں۔

یہ انکشافات سلمان خان نے اپنی نئی فلم سکندر کی او ٹی ٹی ریلیز کے حوالے سے شو میں شرکت کے دوران کیے۔ تاہم گفتگو کے دوران جب بات ان کی صحت کی طرف مڑ گئی تو انہوں نے بتایا کہ وہ 59 سال کی عمر میں بھی شدید جسمانی تکالیف کے باوجود کام جاری رکھے ہوئے ہیں۔

سلمان خان نے کہا:
"میری پسلیاں فریکچر ہو چکی ہیں۔ مجھے ٹرائی جیمینل نیورالجیا ہے، میرے دماغ میں اینیورزم ہے، اور اے وی مالفارمیشن بھی ہے۔ اس کے باوجود میں کام کر رہا ہوں۔"

یہ بیماریاں کیا ہیں؟

دماغی اینیورزم
یہ ایک خطرناک حالت ہوتی ہے جس میں دماغ کی کوئی خون کی شریان پھول جاتی ہے یا غبارے کی شکل اختیار کر لیتی ہے۔ اکثر یہ بیماری بغیر کسی واضح علامت کے موجود رہتی ہے، لیکن اگر یہ پھٹ جائے تو دماغ میں خون رسنے لگتا ہے، جسے ہیمرجک اسٹروک کہا جاتا ہے۔ یہ کیفیت جان لیوا ثابت ہو سکتی ہے۔

اے وی مالفارمیشن (Arteriovenous Malformation)
یہ ایک نایاب بیماری ہے جس میں دماغ یا ریڑھ کی ہڈی کے اندر خون کی شریانیں آپس میں الجھ جاتی ہیں۔ اس کے نتیجے میں خون شریانوں سے براہ راست رگوں میں منتقل ہو جاتا ہے اور کیپلریز کا نظام بائی پاس ہو جاتا ہے۔ یہ حالت غیر معمولی دباؤ، شدید سردرد، دورے، یا اندرونی خون بہنے کا باعث بن سکتی ہے۔

ٹرائی جیمینل نیورالجیا
یہ ایک اعصابی بیماری ہے جس میں چہرے کے ایک جانب شدید اور بجلی کے جھٹکے جیسے درد ہوتے ہیں۔ یہ درد چند سیکنڈز سے لے کر چند منٹ تک رہ سکتا ہے اور روزمرہ کے کاموں کو متاثر کرتا ہے۔