آئی سی سی چیمپئنز ٹرافی 2025 کا مکمل شیڈول جاری کر دیا گیا

 

انٹرنیشنل کرکٹ کونسل (آئی سی سی) نے منگل کے روز آئی سی سی چیمپئنز ٹرافی 2025 کا مکمل شیڈول اور گروپنگز کا اعلان کر دیا ہے۔ یہ ایونٹ 19 فروری سے کراچی میں شروع ہوگا اور 9 مارچ کو فائنل کے ساتھ اختتام پذیر ہوگا۔

یہ آٹھ ٹیموں پر مشتمل ٹورنامنٹ 15 میچز پر محیط ہوگا، جن میں سے زیادہ تر میچز پاکستان کے تین اہم شہروں کراچی، لاہور، اور راولپنڈی میں کھیلے جائیں گے، جبکہ دبئی میں بھی چند اہم میچز ہوں گے۔

پاکستان میں چیمپئنز ٹرافی 2025کے وینیوز

پاکستان میں تین وینیوز، کراچی، لاہور، اور راولپنڈی میں ہر ایک پر تین گروپ میچز ہوں گے۔ لاہور میں دوسرا سیمی فائنل اور اگر بھارت فائنل میں شامل نہ ہو تو فائنل بھی کھیلا جائے گا۔ دوسری صورت میں فائنل دبئی میں ہوگا۔ سیمی فائنلز اور فائنل کے لیے ریزرو ڈے بھی رکھا گیا ہے۔

دبئی میں بھارت کے میچز ہوں گے

بھارت کے تینوں گروپ میچز اور پہلا سیمی فائنل دبئی میں ہوگا۔ یہ فیصلہ سیاسی اور سفارتی وجوہات کے تحت کیا گیا ہے۔

چیمپئینز ٹرافی 2025 کے اہم میچز اور تاریخیں

چیمپئنز ٹرافی کا آغاز 19 فروری کو کراچی میں پاکستان اور نیوزی لینڈ کے میچ سے ہوگا۔ اگلے دن دبئی میں بھارت اور بنگلہ دیش کے درمیان میچ ہوگا۔ 21 فروری کو کراچی میں افغانستان اور جنوبی افریقہ مدِمقابل ہوں گے۔

22 فروری کو لاہور میں انگلینڈ اور آسٹریلیا کے درمیان مقابلہ ہوگا، جبکہ 23 فروری کو دبئی میں پاکستان اور بھارت کا بڑا ٹاکرا ہوگا۔ یہ میچ ٹورنامنٹ کا سب سے زیادہ متوقع مقابلہ ہے اور شائقین میں خاص دلچسپی کا باعث ہوگا۔